ஹால் சிரோவிட்ஸ் கவிதைகள்

1.புத்தகங்களை இரவல் தருவது

நீங்கள் எப்போதும் தருபவராக இருக்கிறீர்கள்,
பெறுவது எப்படி என்பதை
நீங்கள் கற்றுக்கொள்ள வேண்டுமென
என் உளநல சிகிச்சையாளர் கூறினார்.
ஒரு பெண்ணைச் சந்திக்கும் போதெல்லாம்,
நீங்கள் முதலில் செய்வது
உங்கள் புத்தகங்களைக் இரவலாகத் தருவதுதான்.
அவற்றைத் திருப்பித் தருவதற்காக
அவள் திரும்பவும் உங்களைப் பார்க்க வருவாள்
என்று எண்ணுகிறீர்கள்.
ஆனால் என்ன நடக்கிறது?
அவற்றைப் படிக்க
அவளுக்கு நேரம் இல்லை,
அவள் உங்களை மீளவும் பார்த்தால் அவற்றைப் பற்றி  பேசவேண்டியிருக்குமோ என்று
அஞ்சுகிறாள்
தவிரவும்  நீங்கள்
இன்னும் அதிகமாக நூல்களை
இரவல் தரவும் கூடும்.
அதனால் அச் சந்திப்பையே
அவள் ரத்து செய்துவிடுகிறாள்.
நீங்கள் நிறைய புத்தகங்களை இழப்பதோடு அது முடிகிறது.
மாறாக
நீங்கள் அவளிடம் இரவல்
பெறுபவராக வேண்டும்.

2.புகழ் விளையாட்டு

உங்களுக்கு
பிரபலமாக இருக்க வேண்டும்
என்கிற தேவை உள்ளது
என் சிகிச்சையாளர் கூறினார், ஆனால்
முதலில் உங்களுக்கு ஒரு வேலை கிடைக்க வேண்டும்
என நான் எண்ணுகிறேன்
எல்லா பிரபலமான நபர்களையும்  நீங்கள் பார்த்தீர்களானால்
அவர்கள் அனைவருக்கும் வேலை இருக்கிறது.
ஜார்ஜ் புஷ், அவர் வேலை எதுவும் செய்வது போல் தெரியவில்லை
ஆனால் அவர் ஒருமுறை ஜனாதிபதியாக இருந்தார்.
நீங்கள்
எங்கிருந்தாவது தொடங்க வேண்டும். அல்லாது போனால்
உங்கள் சொந்த தலைக்கு உள்ளேதான்
நீங்கள் பிரபலமாக இருப்பீர்கள்
ஆனால் எல்லோருமே அப்படித்தான்.

3.பண்னைக்குத் திரும்புதல்

நானொரு பண்னையில் பிறந்து வளர்ந்தேன்.
காலையில் சீக்கிரமாகவே எழுந்து பால் கறப்பது எனக்கு வழக்கம்.
அவள் சொன்னாள்
என் மார்புகளை நீ பிசைகையில்
அந் நாட்களை நினைவுறுத்துகிறாய்.
ஆனால் அதுவோர் இனிய நினைவாக அமைவதற்குப் பதிலாக
என்னை நீ ஒரு பசுவாக
உணரச்செய்கிறாய்.

4.ஒளியின் இன்மை

கடவுள் மர்மமான வழிகளில் செயல்படுவர்
அப்பா கூறினார்.
ஆனால் உன் தாயைப் போல
அவர் பாதி மர்மமானவர் அல்ல.
வெளிச்சம் உண்டாகட்டும் என்றார். உடனே ஒளி தோன்றியது.
இதில் விந்தையான எதையும்
நான் காணவில்லை.
அவர் சொன்னதைச் செய்தார்.
நாம் படத்திற்கு தாமதமாக செல்லக்கூடாது என்று
உன் அம்மா சொல்வாள்,
ஆனால் ஆடை அணிவதற்கு
அதிக நேரம் எடுத்துக்கொள்வாள்
செல்வதற்கு வழியில்லாமல் போகும்
பிறகு  அவளை எந்த இடத்திற்கும் நான் அழைத்துச் செல்வதில்லை என்று கோபப்படுவாள்.
இருள் மட்டும் இருந்த இடத்தில் கடவுள் ஒளியைப் படைத்தார்.
அவள் குழப்பத்தை மாத்திரமே உருவாக்குகிறாள்.

5.முடிவை அடைதல்

இந்த உறவிலொரு
முடிவை எட்டுவதற்கு
நீங்களிருவரும் முயல்கிறீர்கள்
என் சிகிச்சையாளர் கூறினார்.
நீ அவளை மணக்க விரும்புகிறாய் அவளுக்கோ உன்னை பிரிந்து
செல்ல வேண்டுமென்கிற எண்ணம்.
அவள்தான் வெற்றி பெறப்போகிறாள்
என்று நான் நினைக்கிறேன் 
ஏனென்றால் நீ அவளை
திருமணம் புரிந்துகொள்வதைக் காட்டிலும்
அவள்  உன்னை பிரிந்து செல்வது மிகவும் எளிதானது.
அவளை மணப்பதற்கு
நீ  ஒரு மோதிரம் வாங்க வேண்டும்  இரத்த பரிசோதனைக்கு செல்லவேண்டும்.
தவிரவும் உங்களுடைய இரண்டு குடும்பங்களும்
இணங்கி வரவேண்டும்.
அவள் செய்ய வேண்டியதெல்லாம்
உன்னை மீண்டும் பார்க்காமலிருப்பது மட்டும்தான்.
அவள் ஏற்கனவே
அதை செய்யத் தொடங்கிவிட்டாள் போலத் தெரிகிறது.

000

ஹால் சிரோவிட்ஸ்  (Hal Sirowitz)
____________________________________
சர்வதேச அளவில் அறியப்பட்ட அமெரிக்க கவிஞர் ஆவார்.1)Mother Said; 2)My Therapist Said; 3) Before, During and After;  4)Father Said;  5)Stray Cat Blues. ஆகியன இவருடைய முக்கியமான கவிதைத்  தொகுப்புகள். பதிமூன்றிற்கும் மேற்பட்ட மொழிகளில் இவருடைய கவிதைகள் மொழியாக்கம் செய்யப்பட்டு பல்வேறு இலக்கிய இதழ்களிலும்  கவிதைத் தொகுதிகளிலும் இடம்பெற்றுள்ளன. இவர் தனது கவிதைக்காக Nebraska Book Award,   Poet Laureate of Queens உட்பட பல அங்கீகாரங்களை பெற்றுள்ளார். 

க.மோகனரங்கன்

கவிஞராக அறியப்படும் க. மோகனரங்கன் விமர்சனம், மொழியாக்கத் துறையியிலும்  தொடர்சியாக இயங்கிவருகிறார். மீகாமம்’, ‘அன்பின் ஐந்திணை’, ‘மைபொதி விளக்கு’ உள்ளிட்ட நூல்களின் ஆசிரியர்.